Seido

bruthainn a' Chèitein,
's iad a tha bàn,
aodannan nam maighdeann

mun àirigh
dhan togadh an sluagh an imrich,
crodh Gàidhealach gun charachadh

Seibi

na mo laigh' air mo dhruim-dìreach,
mo bheul ga lìonadh
le grian an earraich

deireadh an fhoghair,
na Granny Smith’s fhathast am bàrr
anns an lios mun cluicheadh iad uair

Santoka

seo a' chlach, bog bàthte
leis an uisge
's i a' comharrachadh na slighe

aig an taigh, tobhta
‘s dìosgan còmhla,
snighe-dubh ‘s tighinn-fodha

Saimaro

feasgar san earrach;
na sgòthan tùrsach;
bratach a' snàmh

ann an Innis Tìle,
gann mìle mìle
air ais a dh’Ì le

Ryoto

tha mi tuigsinn:
cuthag a' goirsinn
sa chamhanaich an-diugh sa mhadainn

bodach agus brèideag
aig tàmh ann am Port Asgaig
a’ feitheamh air an aiseag

Ryota

cha tuirt duine guth,
fear-an-taigh', an t-aoigh,
creamh-na-muice-fiadhaich

an Cùl na Beinne,
gun taigh gun duine,
tuath-gaoithe

Raishi

's e tha bhuam bàs obann
agus mo shùilean
air an socrachadh air Sgurra nan Gillean

agus, as t-oidhche,
ri breithneachadh ri sgàile
gun aithne san sgàthan bhriste

Onitsura

foghar - mi a' sealltainn
air a' ghealaich gun leanaban
agam air mo ghlùin

a’ sealltainn thar Chaolas Shlèite
ris an aon aiseag mun fhàire
‘s a bh’ ann o chionn uair a thìde

Mizuno

fear ann an eilean leis fhèin
a' toirt ainmean
air na gaoitean 's na h-uisgeachan ann

nach buidhe!
Bealltainn agus a’ bhuaile
làn de bhlàthan-grèine

Mizue

's iad nan cadal-suain
sgaoilear na beanntan
le gilead eun

cho bòidheach!
leatha fhèin a’ dol à blàth –
lòineag-an-earraich

Minghua

às dèidh a' chathaidh
rionnagan air an reothadh
air an loch

clisgeadh! am fiadh-ruadh
a-muigh air an t-snàmh
‘s am foghar a’ nochdadh

Midorijo

an dèidh cadal-suain
gun driùchd, nach i tha faisg oirnn,
a' bheinn

taisbeanadh!
a’ ghrian air a glacadh na sgàth
air mullach sabhal a’ bhodaich

Meisetsu

a’ ghaoth ri sèideadh gu liath,
a’ ghrian ri socrachadh
tro rasan a’ gheamhraidh

an sneachd' a' tuiteam far a' mhullaich
agus na h-uain gam breith -
teàrnadh