Buson

uisge san earrach
is gun chomas agam air sgrìobhadh -
cho dòrainneach!

Basho

sgreuch sgreuchag-uisge
na bragadaich mun reothadh as t-oidhche
's mi nam shuidhe

Issa

aon chraobh,
aon raon tuathanaich –
fionnaraidh

Buson

fras as t-earrach,
dìreach gu leòr gus maorach
a' chladaich a fhliuchadh

Yu Chang

uisge bog blàth,
gealach an earraich a’ tilleadh
air a’ chrogan mheirgeach

Basho

cho sàmhach!
far a bheil dealbh an crochadh,
pìobaire-'n-teallaich

Issa

uisge glan on t-sliabh -
daoine tighinn ‘s a’ falbh
ga dhèanamh salach

fhathast air a’ mhonadh
agus an latha dol na chiaradh,
crodh-dubh

Buson

dath 's fàileadh
cruth a chunnacas a' falbh -
imeachd an earraich

Basho

tàrmachan-dè air an imrich
leis fhèin - is air an achadh
fo shoillse na grèine, sgàth

agus a’ ghealach làn ‘s tràigh ann,
ri muasgan ‘s ri dàn
air cladach falamh gu madainn

Issa

an coire na h-eanraich
is anns a’ bhàthaich,
gealach an t-samhraidh

san fhearann às an tug mo chuideachd
an teachd-an-tìr, mi a' coiseachd
leam fhìn an-diugh mar chur-seachad

Buson

an-dè air tighinn gu crìch,
an-diugh a-rithist bidh crìochnachadh -
an t-earrach a' falbh

an dùil an e Clann MhicCruimein a th’ ann,
an fheadhainn gam blianadh fhèin
air an sgeir anns a’ chuan?

Basho

bidh oiteag sa gheamhradh a' falbh
an lùib nan cuilcean a-mach à sealladh
is a' socrachadh na fèath

an làn a’ tighinn a-steach
agus an uair sin a’ falbh –
asal-cladaich

Issa

oidhche gheàrr as t-samhradh,
am feur fo bhlàth –
siosarnaich

cadalan a’ carachadh
agus oiteag shèimh –
chan eil meadhan-latha fad’ air falbh

Buson

an t-aodach cùbhraidh
fhathast gun a bhith air a chur air falbh -
beul na h-oidhche san earrach

Latha Bealltainn, a’ sealltainn
air an fheadhainn air bhog anns a’ Mhuir Mharbh –
cuileagan a’ suathadh

Basho

a' luathadh clò ann am baile -
cù a' donnalaich airson a chèile
le truaighe