Issa

bheil fios agad fhèin
gu bheil am foghar air tighinn,
a dhealain-dè sa chluain?

Buson

nuair a nì an tuagh gearradh,
clisgeadh mun fhàileadh chùbhraidh -
coilltean sa gheamhradh

Basho

bliadhn’ eile air teireachdainn –
currac fhathast air mo cheann
is cuarain air mo chasan

Issa

fiù ‘s còinneach a’ mhullaich
fo bhlàth
‘s an dèidh sin a’ sgapadh

Buson

sa ghaoith a' seacadh nan craobh,
a' tuisleadh a chlisgeadh -
an t-each a' dol dhachaigh

Basho

oidhche – gu slaodach
an solas na gealaich, cnuimh
a’ cladhach ann an cnò-gheamnnaidh

Issa

an clachan san aonach
a’ coimhead falamh –
craobhan an t-samhraidh

Buson

na th' air mo bheulaibh
a' mùthadh na shealladh bhon àm a dh'fhalbh -
fras anns a' gheamhradh!

Basho

an t-earrach,
cnoc gun ainm, ceathach
na maidne ga chòmhdach

Issa

deutzia fo bhlàth –
clann a’ cluich
air tòrradh

Buson

sàmhach ann an achadh
le craobhan-daraich
gealach a' gheamhraidh

Basho

air meanglan gun duilleach air
priachan-dubh air an spàrr
beul na h-oidhche san fhoghar

Issa

a-staigh na mo dhoire,
‘s ann a tha iad a-mach à ùine –
cuileagan-teine

gu h-ìseal anns an fhaoilinn,
bodachan ris an fheamainn,
fliuch, salach fhèin

Buson

do mo shùilean tha e aoibhinn -
gaoithrean mo leannain,
geal fhèin

Basho

feur as t-samhradh –
fuighleach
aisling nan laoch

Issa

gaoth mun t-sliabh -
taigh bho thaigh
le brataichean an t-samhraidh

Buson

far an coinnich na h-aibhnichean,
chanadh tu gun robh sàmhchair ann -
an t-uisge glan

Basho

fealla-dhà dha-rìribh!
thèid e na shneachd' theagamh –
uisg' a' gheamhraidh

Issa

seilcheagan,
mean air mhean
a’ dìreadh Blàbheinn

Buson

a' treabhadh achaidh!
ged nach d'rinn na neòil carachadh,
tha iad air falbh

Basho

air mo chlaoidheadh,
chaidh mi a lorg taigh-seinns’ air an tuath
is fhuair mi wisteria fo bhlàth

Issa

kimono ‘n t-samhraidh
ga chur umam agam – cho luath
‘s a dh’fhàs e preasach!

Buson

feur ann an ceathach
is uisg' a' siubhal gu sàmhach,
an là ri fannachadh

Basho

fear-siubhail bog bàthte:
lurach mar an ceudna san uisge -
seamair-Mhoire

Issa

gealach air a’ chuan –
e fhèin fon ghaoithrean
fo chadal-suain

Buson

thàinig an lòn 's an abhainn
còmhla mar aon
ann an uisg' a' chèitein

Basho

fon aon mhullach
luchd-suirghe cuideachd nan sìneadh -
seamair-Mhoire 's a' ghealach

Issa

na sgairbh a’ spleuchdadh
orra gu cruaidh –
iasgairean sgarbh